Bei enger feierlecher Iwwerreechung um Schoulcampus zu Stengefort huet d’Stengeforter Grondschoul 28.000 Euro un zwou lëtzebuergesch Hëllefsorganisatiounen iwwerreecht. D’Spendegeld staamt vum Charity Run & Walk, deen de 5. Juni 2026 mat de Kanner aus allen Altersstufe vun der Stengeforter Schoul stattfonnt huet. D’Assosicatioun Häerzkrank Kanner Lëtzebuerg an d’Fondatioun Kriibskrank Kanner kruten all Kéier 14.000 Euro.

Un der Iwwerreechung hunn de Buergermeeschter an déi zwee Schäffen, de Schoulpresident, vill Kanner a Léierpersonal souwéi Vertriederinnen a Vertrieder vu béiden Organisatiounen deelgeholl.

Beim Laf am Juni hunn d’Kanner vum Précoce bis zum Cycle 4 esou vill Ronne wéi méiglech zeréckgeluecht. Am Virfeld hate si Sponsore gesicht, déi fir all gelafe Ronn e selwer gewielte Betrag gespent hunn. D’Kanner aus dem Cycle 1 sinn an hirem Schoulhaff bei der Maison Relais gelaf, wärend d’Kanner aus dem Précoce zu Klengbetten moies hiren eegene Laf organiséiert hunn. Am Nomëtteg sinn d’Schülerinnen a Schüler aus de Cyclen 2 bis 4 um Schoulcampus zu Stengefort un den Depart gaangen. Ronn 1.000 Euro koumen zousätzlech beim uschléissenden „After Run Grill & Chill“ zesummen, bei deem och de Buergermeeschter an d’Schäffe selwer hannert dem Grill stoungen.

De Charity Run & Walk sollt de Kanner virun allem vermëttelen, datt si mat hirem eegenen Asaz gemeinsam eppes bewierke kënnen. De staarken Zesummenhalt vun der ganzer Schoulgemeinschaft – Kanner, Familljen, Léierpersonal a Gemeng – huet dëst aussergewéinlecht Resultat eréischt méiglech gemaach.

Häerzkrank Kanner Lëtzebuerg an d’Fondatioun Kriibskrank Kanner setzen sech fir schwéier krank Kanner an hir Familljen an.

Déi begënschtegt Organisatiounen

Häerzkrank Kanner Lëtzebuerg (ALAEC) begleet zanter 2002 Kanner mat enger ugebuerener oder an der Kandheet erkannten Häerzkrankheet, esou wéi hir Familljen. D’Associatioun bitt hinnen, an Zesummenaarbecht mat de behandelnde Kardiologen, finanziell, sozial a psychologesch Ënnerstëtzung an all de wichtege Liewensetappe vum Kand.

D’Fondatioun Kriibskrank Kanner begleet zanter bal 30 Joer Famillje vu Kanner a Jugendlechen, déi u Kriibs oder enger seltener, liewensgeféierlecher Krankheet erkrankt sinn. Hir multidisziplinär Ekipp bitt eng individuell Begleedung vun der Diagnos bis zur Remissioun. Dës ëmfaasst finanziell an administrativ Hëllef, psychologesch a sozial Ënnerstëtzung, esou wéi pädagogesch a fräizäitorientéiert Aktivitéiten.

Iwwer d’École fondamentale vu Steinfort

D’École fondamentale vu Steinfort empfänkt ronn 470 Schülerinnen a Schüler vum Précoce bis an de Cycle 4. Si sinn op d’Schoulsitte vu Steinfort a Kleinbettingen verdeelt. D’Schoul leet besonnesche Wäert op Projeten, déi d’Solidaritéit, dat gesellschaftlecht Engagement an den Zesummenhalt tëscht de Kanner, de Familljen an dem Léierpersonal fërderen, wéi zum Beispill de rezente Charity Run & Walk.