Den 19. Dezember am leschte Joer war erëm déi traditionell Chrëschtfeier vun der Amicale Op Lamp an der Résidence Op Lamp zu Waasserbëlleg – ee vun den Héichpunkter an der Agenda vum Joer.

Bewunner, Personal, Familljen a Membere vun der Amicale waren am festlech dekoréierte Festsall zesummekomm fir d’Joer ausklénge ze loossen. Bei waarmem Gedrénks, Bûche, verschidden anere Zorte Gebäck a bei ville Gespréicher ass eng familiär Stëmmung entstan, bei der een de Geescht vun der Chrëschttzäit konnt fillen.

Musikalesch begleet gouf de Nomëtteg vum Karin Melchert a sengem Pianist mat stëmmungsvolle Lidder.

E ganz spezielle Moment vun der Feier war d’Iwwergab vum generéise Kaddo vun der Amicale un d’Bewunner: e 86 Zoll grousse Multifuntionsécran. Domatter ass et vun elo u méiglech, gemitterlech Filmowender ze maachen, gemeinsam Kinosnoméetteger oder Presentatiounen. Esou leescht d’Amicale e Beitrag, den d’Zesummeliewen am Haus nach weider verbessert.

D’Mme Mireille Wirtz-Lenertz huet der Amicale merci gesot fir hiren Engagement an déi permanent Ënnerstëtzung iwwert eng Zäit vun entre-temps méi wéi 20 Joer. Dëst Chrëschtfeier weist eemol méi, wéi wichteg Momenter vum mateneen si fir Bewunner a fir hir Familljen.